- عمرك سألت نفسك احنا ليه لما دخلنا المدرسة أو الجامعة عمرنا ما فهمنا حاجة ... غير شوية كلام نحشى بيه دماغنا ونفرغه على ورقة الامتحان أو حتى منفرغوش أهو كله كلام عمرنا ما فهمناه ولا ناقشناه ؟.
- عمرك سألت نفسك احنا ليه لما اتخرجنا من الجامعة كان المستقبل مجهول ، وان احنا اتعلمنا حاجة واشتغلنا حاجة تانية خالص ... ده لو لقينا شغل أصلاً ؟.
- عمرك سألت نفسك هو ليه لما بنشتغل المرتب عمره ما يكفى لآخر الاسبوع مش حتى لآخر الشهر ؟.
- عمرك سألت نفسك هو ليه لما بتقضى مصلحة فى الحكومة عمرك ما تقضيها بسهولة ، وليه دايما حتى لو قضيتها يبقى الموظف مكشر فى وشك وخايف يضحك وشه يشقق ؟.
- عمرك سألت نفسك هو ليه الاتوبيس دايما زحمة ؟.
- عمرك سألت نفسك هو ليه انت بتخاف تقرب من قسم الشرطة وضابط الشرطة وكمين الشرطة و"مخبر" الشرطة ؟ .
- عمرك سألت نفسك هو انت ليه بتخاف من السياسة والكلام فى السياسة ؟ .
- عمرك سألت نفسك ليه بتخاف تعمل مشروعك الصغير أو عملك الخاص ... وليه مافيش حاجة صغيرة بتكبر فى مصر ؟ .
- عمرك سألت نفسك هو ليه عسكرى المرور فى مصر بيكتب مخالفات كثير على الناس الغلابة ، أما الناس اللى هما مش غلابة مابيعملوش مخالفات .
- عمرك سألت نفسك هو ليه فى ناس ولاد ناس ، وناس ولاد البطة السوداء ؟.
- عمرك سألت نفسك هو ليه الناس اللى معاهم كارت توصية بيشتغلوا وانت لأ ، هما يعنى ولاد مين فى مصر ؟.
- عمرك سألت نفسك هو ليه فى مصر نتسأل هو انت ابن مين فى مصر ؟ .
- عمرك سألت نفسك ليه الوظيفة فى مصر بقت بالوراثة ؟ .
- عمرك سألت نفسك لو حصلت مشكلة بينك وبين حد كبير ومهم "مخبر يعنى" تفتكر هتاخد حقك فى قسم الشرطة ؟.
- عمرك سألت نفسك هو ليه كل حاجة لازمها واسطة حتى انك تجيب خمسة أرغفة عيش لازم تكون عارف البش مهندس الفران ؟.
- عمرك سألت نفسك هى الحكومة بتضرب المتظاهرين ومش عايزاهم يتكلموا ليه ؟! هى الحكومة خايفة من الكلام ليه ؟ .
- عمرك سألت نفسك هو انت ليه مش بتقدر تجيب شقة تسكن فيها وتبدأ فيها حياتك ؟ .
- عمرك سألت نفسك هى مصاريف التعليم زادت اوى كده ليه ؟ مادام التعليم مجانى !!!!! ؟.
موضوع: كام سؤال رخم كدة ؟؟؟ بس اللى خايف يروح 
السبت يونيو 27, 2009 10:02 pm
